سپریم کورٹ تمام جماعتوں کیلئے انتخابات میں مساوی مواقع یقینی بنائے: پی ٹی آئی

سپریم کورٹ تمام جماعتوں کیلئے انتخابات میں مساوی مواقع یقینی بنائے: پی ٹی آئی اسلام آباد(پی ٹی آئی اپ ڈیٹس)پاکستان تحریک انصاف (پی ٹی آئی) نے مطالبہ کیا ہےکہ سپریم کورٹ پی ٹی آئی کے خلاف امتیازی کارروائی کا از خود نوٹس لے اور تمام جماعتوں کے لیے انتخابات میں مساوی مواقع یقینی بنائے۔ اسلام آباد میں تحریک انصاف کی کور کمیٹی کا اجلاس ہوا، اجلاس کے بعد جاری اعلامیے میں کہا گیا کہ الیکشن کمیشن عام انتخابات کے لیے 8 فروری کا تعین کرچکا ہے، آلودگیوں اور آلائشوں سے پاک انتخابات بنیادی آئینی و جمہوری تقاضہ ہیں۔ اعلامیے میں کہا گیا کہ پی ٹی آئی اور کارکنان کے خلاف ظلم و انتقام جاری ہے، ووٹ کی حرمت پامال کی گئی تو مزاحمت کے سوا کوئی چارہ نہ ہوگا، سپریم کورٹ پی ٹی آئی کے خلاف امتیازی کارروائی کا از خود نوٹس لے، سپریم کورٹ تمام جماعتوں کے لیے انتخابات میں مساوی مواقع یقینی بنائے۔ اعلامیے کے مطابق کور کمیٹی کے اجلاس میں انتخابات کے لیے پارٹی امیدواروں کے تعین پر بھی غور کیا گیا، فیصلہ کیا گیا کہ قومی و صوبائی اسمبلی کی ہر نشست پر اپنا امیدوار کھڑا کریں گے، انتخابات پر ڈاکہ ڈالنے کی کوششوں کا بھی ڈٹ کر مقابلہ کریں گے، الیکشن کمیشن فی الفور ”بلّے“ کے انتخابی نشان کا بنیادی حق دے۔